Plantun de Prouvènço

Pèr coumpara dos planto d'encò nostre

Hieracium stelligerum & Scleranthus annuus

Hieracium stelligerum

Asteraceae Compositae

Nom en français : Épervière à poils étoilés.

Descripcioun :
Aquesto esparello, endemico dóu miejour de Franço, trachis sus li roucas de Vau-Cluso. Se recounèis majamen à si péu estela sus lou dessubre di fueio, ço que ié douno uno coulour grisasso. Li fueio podon èstre tacado e bourdado de péu. De nouta que trachis dins li Mount de Vau-Cluso uno meno apoumictico, caupudo dins Hieracium stelligerum, e que ié dison Hieracium girerdii (en l'ounour de B. Girerd, grand boutanisto vauclusian).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Hieracium
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) enflourejado : 20 à 25 mm
Flourido : Printèms

Sòu : Ca
Autour basso e auto : Pancaro entresigna
Aparado : Noun
Remarco : Endemico dóu miejour de Franço
Abriéu à jun

Liò : Roucas - Esboudèu - Bau - Roucaio
Estànci : Mesoumediterran à Subremediterran
Couroulougi : Éuropo-Ouèst
Ref. sc. : Hieracium stelligerum Froël., 1838

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.